ភ្នំពេញ៖ អ្នកនាំពាក្យក្រសួងការបរទេសលោក អាន សុខខឿន បានឲ្យដឹងថាមាននិស្សិតខ្មែរពីររូបបានទៅសិក្សានៅក្នុងខេត្ត Adana នៃតំបន់មានគ្រោះរញ្ជួយដីប្រទេសតួកគី តែទោះជាយ៉ាងណានិស្សិតពីររូបនោះគឺមានសុវត្ថិភាពធម្មតា និងត្រូវបានជម្លៀសទៅកាន់ទីតាំងមានសុវត្ថិភាពរួចរាល់ហើយ។

លោក អាន សុខខឿន បញ្ចាក់ថា៖ «នៅថ្ងៃទី១០ ខែកុម្ភៈ ឆ្នាំ២០២៣ នេះ និស្សិតទាំងពីរក៏បានមកដល់ស្ថានទូតកម្ពុជា ហើយបានទទួលការជួយឧបត្ថម្ភចាំបាច់ រួមទាំងទីតាំងស្នាក់បណ្តោះអាសន្ន នៅរដ្ឋធានីអង់ការ៉ាដែរ»។

លោកបញ្ចាក់ថា ស្ថានឯកអគ្គរាជទូតកម្ពុជា ប្រចាំសាធារណរដ្ឋតួកគី នឹងបន្តរក្សាទំនាក់ទំនងជាប្រចាំ ជាមួយអាជា្ញធរមានសមត្ថកិច្ចតួកគីនៅមូលដ្ឋាន ព្រមទាំងនិស្សិតនិងពលរដ្ឋខ្មែរ ដែលកំពុងសិក្សានិងរស់នៅក្នុងប្រទសតួកគី ជាបន្តទៀតផងដែរ។

គួរអត់ដឹងផងដែរថាកាលពីថ្ងៃទី៦ ខែកុម្ភៈ ឆ្នាំ២០២៣ ការរញ្ជួយដីលើកដំបូងនៅភាគខាងត្បូងតួកគី និងខាងជើងស៊ីរី បានវាយប្រហារនៅពេលដែលមនុស្សដេកលក់ ហើយវាស់កម្រិត ៧.៩រ៉ិចទ័រ ដែលជាការរញ្ជួយដ៏ខ្លាំងបំផុតមួយនៅក្នុងតំបន់ក្នុងរយៈពេលយ៉ាងហោចណាស់មួយសតវត្ស។ តាមសេចក្ដីរាយការណ៍រហូតមកដល់ពេលនេះមានមនុស្សជាង ២ម៉ឺននាក់ហើយត្រូវបានរាយការណ៍ថាបានស្លាប់៕